Новую заставу адкрылі паблізу радыяцыйна-экалагічнага запаведніка на граніцы з Украінай

Новае падраздзяленне Гомельскай пагранічнай групы ўяўляе сабой комплекс аб'ектаў, створаных у выніку рэканструкцыі былога штаба ліквідацыі наступстваў аварыі на Чарнобыльскай АЭС. Утвораная ў пачатку 2020 года застава ахоўвае каля шасцідзесяці кіламетраў беларуска-ўкраінскай граніцы ў Хойніцкім і Брагінскім раёнах.

З наваселлем ваеннаслужачых прыехалі павіншаваць Старшыня Дзяржаўнага пагранічнага камітэта генерал-лейтэнант Анатоль Лапо, старшыня Гомельскага абласнога выканаўчага камітэта Генадзь Салавей і іншыя.

Як адзначыў на ўрачыстай цырымоніі адкрыцця Анатоль Лапо, сёння асаблівая ўвага надаецца ўладкаванню Дзяржаўнай граніцы Рэспублікі Беларусь, яе інжынернаму абсталяванню, удасканаленню і развіццю пагранічнай інфраструктуры. Вялікую дапамогу ў вырашэнні гэтых задач аказваюць органы ўлады рознага ўзроўню, прадпрыемствы і арганізацыі па ўсёй краіне. Гэта, як гаворыцца, дарагога каштуе, прычым не толькі ў фінансавым вымярэнні, але і ў маральным плане. «Сёння пагранічная застава «Хойнікі» – узор комплекснага прымянення разнастайных сіл і сродкаў у ахове дзяржаўнай граніцы. Яна займае асаблівае месца ў забеспячэнні пагранічнай бяспекі на ўчастку Палескага дзяржаўнага радыяцыйна-экалагічнага запаведніка і ў бліжэйшы час будзе даабсталявана сучаснай тэхнікай і сігналізацыйнымі сродкамі», – адзначыў кіраўнік пагранічнага ведамства.

Пры рэканструкцыі аб'ектаў улічваліся ўсе асаблівасці нясення службы пагранічнікаў на тэрыторыі Палескага дзяржаўнага радыяцыйна-экалагічнага запаведніка. Акрамя таго, для эфектыўнай падрыхтоўкі ваеннаслужачых узведзены гарадок пагранічнай службы і спартыўныя аб'екты. Паклапаціліся і аб бытавых умовах для абаронцаў граніц: у прасторных памяшканнях для адпачынку, прыёму ежы ўстаноўлена зручная мэбля і бытавая тэхніка, пабудавана лазня з басейнам. Таксама ў падраздзяленні абсталяваны закрытыя боксы для захоўвання і рамонту тэхнікі, заправачная станцыя, сучасная аўтаномная сістэма ацяплення і іншыя важныя аб'екты інфраструктуры. Тэрыторыя ахоўваецца з дапамогай тэхнічных сродкаў аховы.

На пагранічнай заставе створаны Цэнтр маніторынгу, які ў рэжыме анлайн дазваляе дыстанцыйна кантраляваць звыш 100 кіламетраў граніцы з Украінай пры дапамозе розных сістэм аховы і назірання.

Галоўнай асаблівасцю падраздзялення з'яўляецца тое, што ахова дзяржаўнай граніцы ажыццяўляецца на тэрыторыі з павышаным радыяцыйным фонам. Для бяспечнага выканання задач на забруджанай тэрыторыі і своечасовага выяўлення крыніц радыеактыўнага выпраменьвання пагранічная застава ўкамплектавана найноўшымі ўзорамі тэхнікі, тэхнічнымі сродкамі і індывідуальнымі сродкамі абароны.

Значную дапамогу пагранічнікам у забеспячэнні выканання задач па ахове граніцы на тэрыторыі ПГРЭЗ аказала рэалізацыя міжнароднага праекта паміж Дзяржпагранкамітэтам Рэспублікі Беларусь і Міністэрствам энергетыкі ЗША па супрацоўніцтве ў сферы прадухілення незаконнага абароту ядзерных матэрыялаў і іншых радыеактыўных рэчываў.