Купіў за $ 1100: у мінскім аэрапорце затрыманы іншаземец з фальшывым пашпартам
Фота носіць ілюстрацыйны характар
У сталічным аэрапорце пагранічнікі затрымалі мужчыну, які спрабаваў патрапіць на самалёт з падробленым пашпартам. Акрамя таго, высветлілася, што ён знаходзіцца ў міжнародным вышуку.
Каля поўдня 28 лютага пры афармленні на рэйс «Мінск-Кіеў» у пашпарце на імя 29-гадовага грамадзяніна Манголіі былі выяўлены прыкметы частковай падробкі. Праведзеная спецпроверка паказала, што ў дакуменце цалкам заменена старонка з дадзенымі аб яго ўладальніку.
Затрыманы прызнаўся, што пашпарт падроблены. Са слоў, яму не 29, а 26 гадоў. З дакументам, які каштаваў парушальніку 1100 долараў ЗША, дапамаглі знаёмыя, аднак незаконна перасячы беларускую граніцу ў хлопца не атрымалася.
Асоба затрыманага высвятляецца, ён змешчаны ў ізалятар часовага ўтрымання. Акрамя адміністрацыйнай адказнасці за парушэнне правілаў знаходжання і спробу незаконнага перасячэння граніцы, замежніку пагражае абмежаванне волі на тэрмін да двух гадоў за выкарыстанне падробленага дакумента.