У пошуках лепшых умоў жыцця: на граніцы з Літвой затрыманы парушальнік
25 ліпеня смаргонскія пагранічнікі затрымалі мужчыну, які спрабаваў незаконна перасекчы граніцу.
Каля 9 гадзін раніцы на заставу «Лоша» паступіла аператыўная інфармацыя аб руху невядомага ў бок Літвы. Праз некалькі хвілін паказанні сігналізацыйнага комплексу пацвердзілі гэтыя звесткі, а дзяжурны па заставе з дапамогай сістэмы відэаназірання ўжо «паводзіў» правапарушальніка. Неўзабаве паграннаряд затрымаў яго ў 150 метрах ад граніцы.
Затрыманы адразу ж прызнаўся ў сваіх незаконных намерах. У далейшым высветлілася, што ён з'яўляецца асобай без грамадзянства і жыве ў Магілёве.
Варта адзначыць, што на год раней мужчына ўжо прыцягваўся за парушэнне пагранічнага рэжыму.
У дачыненні да правапарушальніка распачаты адміністрацыйны працэс за спробу незаконнага перасячэння граніцы, парушэнне правілаў знаходжання і пагранічнага рэжыму. Да завяршэння разбіральніцтва затрыманы будзе знаходзіцца ў ІЧУ Смаргонскай пагранічнай групы.