У Мінску адбылася цырымонія гашэння паштовага канверта, прысвечанага Герою Савецкага Саюза Івану Барсукову
Сёння, 11 студзеня, у Дзяржпагранкамітэце адбылася цырымонія гашэння дзяржаўнага знака паштовай аплаты «Іван Пятровіч Барсукоў» серыі «Героі Савецкага Саюза». У ёй прынялі ўдзел Старшыня Дзяржпагранкамітэта генерал-лейтэнант Анатоль Лапо і міністр сувязі і інфарматызацыі Канстанцін Шульган.
Мастацкі маркіраваны канверт падрыхтаваны рэспубліканскім унітарным прадпрыемствам паштовай сувязі «Белпошта» пры садзейнічанні пагранічнага ведамства. Яго тыраж склаў 25 тысяч экзэмпляраў.
Увага да асобы гераічнага пагранічніка была звернута не выпадкова. Літаральна праз некалькі дзён – 22 студзеня – спаўняецца 75 гадоў з дня нараджэння Героя Савецкага Саюза Івана Пятровіча Барсукова. Ён прайшоў шлях ад радавога да палкоўніка, начальніка Брэсцкага Чырванасцяжнага пагранічнага атрада імя Ф. Э. Дзяржынскага, які пад яго камандаваннем у 1989 годзе стаў лепшым у сістэме пагранічных войскаў СССР. За мужнасць, адвагу і гераізм, праяўленыя пры выкананні спецыяльных задач у Рэспубліцы Афганістан, Івану Пятровічу Барсукову прысвоена званне Героя Савецкага Саюза.
Знакі паштовай аплаты на тэматыку, звязаную з пагранічнай службай, карыстаюцца асаблівай папулярнасцю ў жыхароў краіны. Так, лепшай маркай 2022 года ў выніку адкрытага інтэрнет-галасавання, якое праводзіцца рэспубліканскім унітарным прадпрыемствам «Белпошта», прызнаны малы ліст «Службовыя сабакі пагранічнай службы Беларусі». Яе дызайн распрацавала Марына Віткоўская. Кожны другі ўдзельнік галасавання аддаў перавагу марцы з выявай аўчарак і лабрадора, якія нясуць службу на граніцы.
