Першакурснікі Інстытута пагранічнай службы прынялі Ваенную прысягу
Сёння, 27 жніўня, на страявым пляцы Інстытута пагранслужбы адбыўся ўрачысты рытуал прывядзення да Ваеннай прысягі. Клятву на вернасць Радзіме ў прысутнасці кіраўніцтва і афіцэраў пагранічнага ведамства, Інстытута пагранічнай службы, родных і сяброў зачыталі 74 курсанты.
На працягу жніўня маладыя людзі асвойвалі курс пачатковай вайсковай падрыхтоўкі ў навучальным цэнтры Інстытута. Ужо прайшлі заняткі па тактыцы пагранічнай службы, інжынернай падрыхтоўцы, агульнавайсковай тактыцы, вучэбныя стрэльбы і страявыя трэніроўкі.
Сярод цяперашніх першакурснікаў - большасць выпускнікоў агульнаадукацыйных школ, шасцёра з якіх маюць «залатыя» медалі. Кожны чацвёрты – раней праходзіў тэрміновую або кантрактную службу. Ёсць сярод іх і тыя, хто паспяхова скончыў навучанне ў кадэцкіх вучылішчах альбо ваенна-патрыятычных класах пагранічнай скіраванасці. Асаблівасцю гэтага набору таксама стаў прыём дзяўчат на спецыяльнасць "Ідэалагічная работа".
Старшыня Дзяржпагранкамітэта Рэспублікі Беларусь генерал-лейтэнант Анатоль Лапо выступіў з прывітальным словам і павіншаваў курсантаў і іх бацькоў з урачыстай падзеяй. Ён падкрэсліў, што кожнаму першакурсніку трэба будзе напружана працаваць для асваення выбранай прафесіі, спасцігаць усе яе тонкасці, выхоўваць у сабе афіцэрскія якасці, каб заўсёды і ва ўсім быць прыкладам для падначаленых.
Да слоў віншаванняў таксама далучыліся намеснік старшыні Пастаяннай камісіі Палаты прадстаўнікоў Нацыянальнага сходу Беларусі палкоўнік запасу Аляксандр Маркевіч, заслужаны пагранічнік Рэспублікі Беларусь, ветэран вайны ў Афганістане, начальнік факультэта пагранічных войскаў Ваеннай Акадэміі Рэспублікі Беларусь з 1997 па 2010 гг. палкоўнік у адстаўцы Віктар Петрыкевіч, намеснік старшыні Сінадальнага аддзела Беларускай Праваслаўнай Царквы па ўзаемадзеянні з Узброенымі Сіламі Рэспублікі Беларусь іерэй Іаан Кавалёў, а таксама родныя і блізкія.
Пасля завяршэння мерапрыемства курсантам было дадзена права на сваё першае звальненне.